任正非創立華為初期 賣過減肥藥同墓碑？

尋日就同史友們介紹到任正非先生喺創立華為初期因為見到「中華有為」呢四個字而覺得好有感覺，最後就以「華為」命名自己呢間企業。眾所周知今時今日嘅華為唔單止成為過全球第二大智慧型手機製造商，甚至仲可以建設電信網路，但唔講唔知，其實呢間公司喺建設初期係從事過好多其他業務架！

任正非早年接受訪問就表示，自己出生喺一個貴州嘅小山村，父母都係鄉村教師，一家九口早年都生活得相當貧困，但喺咁樣嘅情況之下，任正非仍然憑個人努力同埋天份考入重慶建築工程學院。佢喺畢業之後曾經去過當兵，喺部隊做咗十幾年之後甚至仲成為科研尖兵，其後就轉到一間國有企業繼續工作。

之不過佢嘅生活一啲都唔平坦，佢先係喺商場上畀人呃咗200萬、公司將佢開除、老婆同佢離婚，一時之間所有挫折都遇上。但佢並冇咁樣放棄，一貧如洗嘅佢就喺深圳開創咗華為，早年華為並唔係咩科技公司，反而係咩貨物都賣下，就好似減肥藥、保健品、火災報警器、墓碑等都賣過。直到任正非參加一次老戰友聚會，一位老朋友介紹佢從事電話交換機生意，因為呢次偶然，令到任正非同埋華為都進入通信領域。